مع بداية أول ليالي نوڤمبر بدأ الدكتور ميخائيل احمد محمد محمد احمد نور الدين في اعداد المحاضرة الي هيلقيها علي طُلابه والي كان عنوانها : "كيف بدأ الخلق " ..ولأنه انسان ديمقراطي يؤمن بفن الحوار وتقبل الرأي الأخر وكل الكلام الفاضي ده يعني قرر انه قبل ما يدخل في صلب الموضوع يطرح السؤال علي الطُلاب كتمهيد للمحاضرة عشان يتعرف علي الخلفية الدينية لكل شخص خاصة ان الي قاعدين قدامه من عقائد مختلفة وبدأ يتلقي الإجابات الي كان بعضها بيحمل طابع اسلامي والبعض الآخر طابع مسيحي ورغم اختلاف الصياغة إلا ان الإجابات نوعا ما كانت متشابهة في الجوهر ..لحد ما جه الدور علي الطالب الي قاعد في اخر البينش فوقف وقال بكل ثقة : " بيضة يا دكتور" .
في البداية ، أو ما قبل البداية ..مكانش في حاجة خالص ..كتلة شبه عدمية يتخللها فوضي من فتات مبعثر غير معلوم ماهيته ..تجمع الفتات وكون لينا بيضة هيُطلق عليها فيما بعد البيضة الكونية ، ولأن كل شيء لازم يكون ليه نهاية فبعد 18 الف سنة البيضة فقست..غالبا كان عندها نقص كالسيوم ..وخرج منها بان كو و مسك كتلة اليين يانغ الي بتمثل الخير والشر وراح قاسمها نصين بالفأس العملاقة بتاعته فخلقلنا الأرض والسماء الي كانوا قريبين جدا لبعض في أول الأمر لكن لأن بان كو كان طوله بيزيد مع الأيام فبدأ يدفع السماء لأعلي لحد ما بُعدها عن الأرض وصل للي عليه دلوقتي .
بان كو كان خامس الكائنات الحية الموجودة علي الأرض واتجوز من الإلهة"نيوا وا " لكنه مات بعدها بفترة قليلة فعينه اليمين اتحولت للشمس وعينه الشمال اتحولت للقمر ، وأنفاسه الي ريحتها بصل شكلت الرياح والغيوم ..وشعر جسمه شكل الأشجار والغابات ورأسه شكلت الجبال ..ما هي زاطت بقا .
وبسبب احساس زوجته بالوحدة بعده قررت خلق كائنات قريبة في الشبه منه فشكلت تماثيل من الطين ونفخت فيها ومن هنا اتخلقلنا البشر ..بس شفت بداية الخلق سهلة ازاي .
بغض النظر عن الهرطقة الي فاتت لكن دي مش مجرد حكاية بتتحكي ده الاعتقاد السائد حاليا عند معظم شعوب شرق آسيا خاصة الصين واليابان ..والي أكدها تشو تشينغ عالم الحفريات الصيني بجامعة بكين بعد ما وجد نفس الحكاية منحوتة علي حجر بيرجع لسنة 149قبل الميلاد ..ورغم وجود تناقضات كتير في الحكاية دي زي ان ازاي بان كو اتخلق من العدم وفي نفس الوقت كان خامس الكائنات الحية يبقي الهدف من الأسطورة واضح وهو اعطاء الأفضلية للرجل الصيني حسب كلام المؤرخ جيمس ليك الي وضح ان الحكاية المزعومة ما هي إلا تحريف لقصة آدم عليه السلام وبداية الخلق وطريقة إحياءهم عن طريق النفخ في الروح ، وان مفيش اي دليل قوي علي وجود ما يسمي ببان كو وممكن يكون هو نفسه "ادم " عندهم ..كمان بعض المبشرين استخدموا الأسطورة في إثبات نظرية التطور بسبب صور بان كو الي بيظهر فيها بشعر كثيف كأنه قرد أو دب .
تم انشاء اول معبد لبان كو سنة ١٨٠٩ في مقاطعة هوادغو الصينية وبيتوافد عدد كبير له سنويا من هناك للتقديم القرابين لتمثاله .."بيعبدوا واحد خارج من بيضه ..اكيد بيبدأوا صلاتهم وهما بيقولوا اشطر كتكوت ".
ليست هناك تعليقات:
إرسال تعليق