 |
| رواية نسل الخالدين |
نسلُ الخالدين
الكاتب: عبدالرحمن محمد خلف
اصدار: الفنار للنشر والتوزيع
عدد الصفحات: 162
تاريخ النشر: معرض الكتاب 2022
-----------
عن العمل :
_اعترافات مكتوبة بخط اليد من قبل بطل الرواية شريف العدل الي بيقر فيها عن جرائم القتل الي ارتكبها في شقته بعد ما يخلي الضحايا يخضعوا للتجربة علي جهاز اخترعه بيقدر بيه يتحكم في ذكرياتهم ويعدل عليها .
-----------
مناقشة :
1_قبل الدخول في أي شيء يخص الرواية حابب أشيد بالمجهود الخارجي المعمول زي صور الاعترافات المرفقة في صفحات الرواية والي فعلا تبان انها مكتوبة بخط الإيد والي بتطابق النص الأصلي الي انا بقرأه ، ده خلاني اندمج مع الحالة العامة أسرع لأنه حول الاعترافات الي انا برسملها صور في دماغي لواقع ملموس فعلا .
2_رغم ان الأحداث بتدور في نطاق واحد هو شقة البطل الا اني محستش بالملل غير في أجزاء قليلة جدا ، ده اولا لأن السرد كان اكتر من الحوار فالرتم كان سريع ، ثانيا لأن الكاتب قدر يستغل ذكريات الضحاية في انه يضيف متعة وإثارة للأحداث.
3_اللغة جيدة جدا وسلسة لكن محبيتش الخلط الي كان بيحصل في بعض الأماكن بين العامية والفصحى .
4_اتضايقت من كثرة التشبيهات الي بدون داعي الي كانت بتوحي بحماس عند الكاتب في عرض قوة قلمه لكنها كانت غيرة موفقة لأن أغلبها مأضافش أي قيمة بلاغية للنص.
5_باستثناء شخصية البطل فجميع الشخصيات تعتبر فرعية مقدرتش اخد اي انطباع عنهم وانا مش محتاج بصراحة لأنهم كانوا مجرد أدوات استخدمها الكاتب كهدف للبطل في تحقيق تجاربه ، كمان فكرة خلق ماضي قذر ليهم دي ذكية لأنها حسست القارئ بالرضا ومخلتوش مضايق من الي حصلهم .
6_شخصية البطل "شريف العدل" كانت مصممة بإتقان وتم التمهيد ليها بشكل كويس سواء من طفولته وتعامل والده معاه أو البيئة الي محيطة بيه ده خلاني متقبل التناقض بتاعه واصابني بفضول تجاه تصرفه الجاي الي مش عارف هيكون ايه .
7_عجبني لعب الكاتب علي كذا لون ادبي سواء الخيال العلمي أو الجرائم والي ساعد فيه ده تناقض البطل نفسه الي فيه من كل الألوان دي .
8_ النهاية تعتبر أفضل اجزاء العمل ، البلود تويست اتنفذت بإحكام والموضوع طلع اكبر من مجرد جرائم قتل وشايف أنه ممكن يمهد لجزء تاني الحقيقة .
_كمجمل الرواية جيدة جدا ، ممتعة وتجربة كويسة تخلص في وقت مش كبير ، وبرشحها طبعا ..سلام
ليست هناك تعليقات:
إرسال تعليق