الشيخ جو "عبادة جوجل" - أمام مصنع الكراسي

الشيخ جو "عبادة جوجل" - أمام مصنع الكراسي

"لبيك جوجل "

جملة خرجت بعفوية وحماس من أحد أصدقائي تعبيرا عن فرحته بوصولنا اخيرا لنتائج مرضية عن الموضوع الي كنا بندور عليه، والحقيقة كلنا كنا عارفين أنه مهما كان الى انت بتبحث عنه يبان مبهم أو صعب توصله فهو مش هيستعصى على جوجل ؛ لكن حسيت جملته الي قالها دي مبالغ فيها شوية، وبدأت تستثيرني ظنون كتيرة عن انه هل ممكن حد فعلا يقدس الكيان الافتراضي ده لمجرد أنه بيقدر يصل لكم غير محدود من المعلومات ،بالرغم من ان الموضوع شدني الا اني نسيته بسبب الانخراط في أولويات تانية لحد امبارح لما وصلتني رسالةالساعة اتنين الفجر:" الشيخ جو يريدك "

في سنة 2009 وبعد حوالي عشر سنين من تأسيس محرك البحث جوجل كتير من الأخصائيين النفسيين اشتكوا من خطورته وقد ايه هو بيسحب وقت الناس بشكل مش طبيعي وخلى عندهم كسل غريب وقلل شغف البحث عن المعلومات لأن أي حاجة عايزها بقا تقدر توصلها بمجرد نقرة من خلاله، ده بقا دفع عمك ماكفيرسون رئيس شبكة Cisco للاتصالات في الوقت ده بانشاء كنيسة افتراضية سماها كنيسة جوجل كنوع من السخرية من التقديس الأعمى إلي بيعطيه الناس وهما مش حاسين لمحرك البحث والوقت الزائد عن الحد الي بيقضوه عليه .

بالرغم من ان الي عمله ماك كان من باب الدعابة مش اكتر ، الا انه فتح الباب لكثير من التساؤلات في المجتمع الغربي أنه ليه فعلا منعتبرش جوجل إله ، ولكن كلها كانت مجرد شكوك بتروح تلقائيا لما الناس تدرك تفاهة الفكرة ، بس ده مكانش نفس تفكير الشباب اللادينين في غرب اوروبا الي فعلا بدأوا ينادوا بإن جوجل هو أقرب تجسيد للإله ولو هنعتبر فعلا ان في "رب" يبقي هو ده الي يستحق اللقب. 

دعواتهم لاقت في البداية استهجان وسخرية من الناس لكن مع الوقت بدأ ينضملهم شباب من مختلف المعتقدات منهم الي مصدق ومنهم الي بيعمل كده علي سبيل السخرية من باقي المعتقدات ومنهم الي داخل للمتعة مش اكتر وأسسوا فعلا منتديات خاصة بيهم علي ريديت لحد ما وصل عددهم لاكتر من خمسين ألف معتنق، وبالرغم من ان العدد ميبانش كبير الا انه عدد يخوف بالنسبة لمدى سطحية الفكرة . 

جوجل نفسها بقا ياعمنا قررت تستغل ده في الدعايا ليها وأسست فعلا اول موقع رسمي للديانة وعملت حاجة علي الموقع فيما يشبه كتاب مقدس ليها فيه دلائل تسعة علي الوهية جوجل زي انه عليه اكتر من تسعة مليار صفحة معلوماتية وأنه بيقدر يحدد مكانك في اي وقت وأشياء من هذا القبيل . 

طبعا الي عملته جوجل هو أمر اقتصادي بحت لتزويد عدد المستخدمين اصلها مش محتاجة مجهود عشان تدرك ان المعلومات الي علي جوجل احنا كبشر السبب فيها وان هو من غير المدونين والناس الي بتكتب عليه ولا حاجة كمان مش محتاج اقولك عن عدد المرات الي حصل فيها عطل لخدمات جوجل ووقف تماما اخرهم كانت السنة الي فاتت فبالتالي حوار انه موجود دايما فاكس . 

بغض النظر عن كل الي اتقال ده ، الشاهد من الموضوع ان البشر دايما فيهم غريزة سيئة وهي احتياجهم لتجسيد صنم يدوله قدسية غير مستحقة وهما اصلا السبب في وجوده ، فهتلاقي مفيش فرق كبير بين الي نحتوا تماثيل بإيديهم واعتبروها آلهة مطلقة أو الهة لعناصر في الطبيعة زي الهوا والنار وبين الي اخترعوا أداة لعرض المعلومات ومع مرور الوقت قدسوا الأداة لعرضها معلومات هما اصلا السبب فيها . 

عشان كده بمجرد ما شفت رسالة الشيخ جو كل الي عملته اني قفلت الراوتر فمات الإله بتاعهم .