مراجعة كتاب "مولد سيدي الكداب" - الكاتب محمد راضي

مراجعة كتاب "مولد سيدي الكداب" - الكاتب محمد راضي

 في رحلة البحث عن الضحك ..الإنسان بيقابل عقبات كتير جدا بتتدرج في صعوبتها من أشياء بايخة"في لفظ تاني بس مش هقوله عشان امي بتشوف بوستاتي" لأشياء من كتر ما هي بايخة ممكن تأثر علي صحة الواحد الإنجابية ، ولكن لأن استمرارية السعي تتضمن حتمية الوصول ففي النهاية الواحد بيوصل لمبتغاه ويلاقي حاجة بتضحك فعلا . 

-------------

مولد سيدي الكداب 

الكاتب: محمد راضي

اصدار: زين للنشر والتوزيع

تاريخ النشر: 2022 

متوسط عدد الصفحات: 138 صفحة 

-------------

 عن العمل:

*مولد سيدي الكداب هو أحدث اصدارات الكاتب محمد راضي في معرض الكتاب 2022 .

*العمل واقف علي أرض محايدة بين كونه رواية ساخرة وبين كونه مجموعة سكتشات ، فهنلاقي الأحداث بتحصل في نفس العالم الي كان في أعماله الي قبل كده "القتل يسبب الوفاة ؛هكذا تكلم حموءة" وهو دولة "شيت لاند" والي بيحصل فيها مستجدات كتير اهمها إن الشعب معدتش طايق سياسة رئيسهم "التيس" القمعية فقرروا يلجأوا لقبيلة الصادقين عشان يعملوا انقلاب وفعلا ده بينجح وبيمسك الدولة واحد من القبيلة أطلق علي نفسه الصادق بيبرس الي مبيكدبش ابدا وبيبيح كل الجرائم الا الكذب هو الحاجة الوحيدة الي بيعاقب عليها القانون ومن هنا بتبدأ البلوة .

-------------

حاجات عجبتني : 

لو جينا نتكلم عن مهمة الكاتب الأساسية هنا وهي "الكوميديا والضحك " فبوجه عام الكاتب قدر يحققها بامتياز ، علي مدار قرائتي للعمل انا كنت بضحك من اول الابتسام لحد مواقف كانت بتقتلني ضحك حرفيا . 

اكتر ميزة عملها الكاتب هنا من وجهة نظري هي انه تفادى اخطاء كارثية كانت في "هكذا تكلم حموءة " وهنا انا بتكلم من منظوري انا لأن في ناس كتير عجبها الكتاب ده ومعنديش مشكلة اطلاقا ..المهم الحتة الي بتكلم فيها هي أنه الكاتب في العمل الأولاني استهلك كل الي عنده في أول خمسين صفحة تقريبا الي كنت بضحك فيهم جدا ومستمع بالقصة لكن بعدها كده الموضوع بوخ اوي والإيفيهات حسيتها اوفر شوية كمان حصل خلل في القصة وحشو عشان تخلص ، لكن في مولد سيدي الكداب الأمر اختلف تماما ..الكاتب كان ذكي في تقسيمته الكتاب لمجموعة من الشخصيات بنعيش مع كل شخصية سكيتش خاص بيها هي والكوميديا بتتخلق من المواقف الي بتتعرضلها الشخصية ، ده خلي الرتم بتاع الكوميديا ثابت ولو اتغير بيكون للأحسن ..كمان حتة إن كل الشخصيات دي باللي بيحصل ليها بيتقدملنا تحت مظلة القصة الأساسية ده حفزني كقارئ اني اكمل العمل وخلى الأجزاء الي كان فيها سرد بس من غير اي كوميديا مش مضايق منها لأني ملزم بقصة عايز اعرف ايه الي هيحصل فيها . 

العمل تناول اسقاطات سياسية كتير بشكل ساخر وده خلق نوع من الكوميديا السوداء الي أضافت صبغة احترافية شوية . 

فكرة بدء الرواية بإنه يعرفك ان كل حاجة مباحة في شت لاند ما عدا الكذب وإن الرئيس الصادق بيبرس مش بيكدب ابدا دي كانت اداة مفتاحية عبقرية اوي لأنه حدد بيها هيدخلك منين عشان يضحكك ، يعني عايزك تتخيل معايا إن الكذب والمجاملات وكل ده بقا مخالف للقانون وباقي الأخطاء عادي ..ده خلي كمية الكوميديا الي تطلع من هنا عالية . 

شخصية "الي ما يتسماش" والي تعتبر أحد أفضل أجزاء العمل ..تصميم الشخصية دي كان جامد لأبعد حد بحظها السيء بميولها الغريبة والجملة الملازمة له "انت تعرف حد من اهلي " 

النهاية الي قفل بيها جيدة وذكية جدا ورمزية الي حدٍ ما وبرضه فيها جانب من العبثية يخليك تضحك برضه . 

استعانته بشخصية الجن"حموءة "من الرواية التانية كان لطيف ..يعني انا حبيت حموءة هنا اكتر من لما كان البطل في العمل السابق . 

-------------

ملاحظات صغنونة: 

السرد كان باللغة العربية الفصحى والحوار بالعامية وده معنديش مشكلة معاه خالص خاصة إن ده عمل ساخر والضحك الي تقدر تطلعه من العامية اكتر ..بس الي معجبنيش الدمج الي كان بيحصل بين العامية والفصحي في السرد يعني تلاقي الكلام ماشي بالفصحي هوب تلاقي جملة بالعامية تغير نمط القراءة بتاعك اصلا .. وللأمانة الأجزاء الي فيها كده لا تتعدي ١٠في المئة من الكتاب ولكنها كانت بتقفلني الصراحة . 

-------------

اختصارا الكتاب حلو جدا، خاصة لو انت واحد مضغوط ونفسيتك زفت وفي ثانوية عامة زي حالاتي فالكتاب هيغيرلك مودك للأحسن..وختاما بشكر محمد راضي علي التجربة الجميلة دي ، سلام