الكاتب /د/عمرو عبدالحميد .
اصدار /عصير الكتب
متوسط عدد الصفحات/271
تاريخ النشر /معرض الكتاب 2021
التصنيف /فنتازيا .
______________________________
عن العمل:
فتاة الياقة الزرقاء هو العمل السادس لعمرو عبدالحميد بعد ثنائية زيكولا وقواعد جارتين ..بتدور احداث الرواية في مدينة المنصورة في المستقبل البعيد بعد قرون من دلوقتي حيث في وباء كان أصاب البشرية أدي لولادة كل الإناث بسرطان في أرحامهم مما اضطر الأطباء أنهم يستأصلوا الجزء ده عشان يحافظوا علي حياتهم وكان ده معني نهاية البشرية بسبب عقم جميع الإناث الي في الأجيال الجديد لحد ما في فترة معينة اتولدت بنت رحمها سليم ولما عملوا بحث شامل لقوا ان من كل 100بنت في تلاتة بيتولدوا برحم سليم فبدأت الحكومات تجمع البنات دي وتدخلهم في شركة مسأولة عن استخدام ارحامهم في حمل أجنة ناس تانية عشان يحموا الجنس البشري من الإنقراض..لكن بيطلع في مؤامرة ورا الموضوع ده
______________________________
مناقشة:
1- من الحاجات الي لازم نشيد بيها هي محاولة الكاتب انه يغير لونه ويخرج بره صندوق روايات أدب الأراضي الأخري والفنتازيا البحتة.. لا احنا هنا عندنا فنتازيا لكنها في عالمنا ده تقدر تقول عليها أقرب للخيال العلمي لأن معظم نقاط الفنتازيا في الرواية هي حاجات واردة الحدوث مستقبلا .
2- لغة الكاتب الي فيها تطور ملحوظ لأنه قبل كده كنت تحس لغته بتخاطب فئة معينة من القراء من ١٥لعشرين سنة لكن في الرواية دي هي كانت مناسبة لمعظم الفئات.
3- تقديم الشخصيات كان ضعيف جدا باستثناء شخصية البطلة ورئيس مغفر القرية مع ان معظم شخصيات العمل المفروض انها محورية وليها دور مؤثر في مجري الأحداث لكن للأسف هما مأخدوش حقهم كفاية وده خلاني مش قادر ارسم خلفية ليهم ولا أفهم أو احدد دوافعهم الي كانت غير مبررة اطلاقا بالنسبالي زي ان ايه الي يدفع رامي يساعد البطلة ضد شركة تلقيح البويضات رغم ان ده ممكن يدمر مستقبله ..والتحول المفاجئ للشخصيات الي كانت هادية في الاول بعدين اتفاجئ بكمية الشجاعة الي عندهم ..كل دي حاجات الكاتب ممهدش ليها بشكل كويس .
4- ايقاع الأحداث كان متضارب بين كونه هادي في مناطق وسريع في مناطق تانية وكل ده لحد صفحة رقم 100وبعد كده الرتم بقا بطيء اوي والرواية بقيت مملة وجدا وكنت عايز اخلصها كأنها تقضية واجب وخلاص .
5- الثغرات الكتيرة الي توغلت في الحبكة وخلتها غير منضبطة ومش هقدر اوضحها اوي عشان محرقش لكنها حاجات كانت متعلقة بأرقام وتواريخ الأحداث عملت تناقض معاها بعد كده .
6- النهاية والي تعتبر أسوأ حاجة في الرواية والي كانت عادية اوي تفتقر لأي شكل من الإبداع ، الي هو عارف انت نهايات الكرتون السعيدة زيادة عن اللزوم دي اهي دي حاجة زي كده .
7- في أول نقطة قولتلك اني حابب أشيد بإن الكاتب قدم فكرة جديدة لكنه للأسف استسهل ، يعني رواياته الي قبل كده رغم ان عندي مشاكل مع معظمها باستثناء قواعد جارتين الجزء الاول لكن منقدرش ننكر أنه الكاتب تعب في انه يرسم عالم تاني شبه متكامل بقوانين غير قوانينا وكانت حاجة كده بتواكب افلام ديزني ، لكن في الرواية دي لما حب يكتب حاجة ليها علاقة بالخيال العلمي كانت فكرته كيليشيهية اوي واتهرست في اكتر من عمل زي مقابر الأحياء واكتر من فيلم وكان في استسهال واضح اوي يعني أنا محسيتوش تعب زي زيكولا أو جارتين في العمل ده .
______________________________
الرواية كمجمل مش عايز اكون قاسي واقول انها سيئة ، لكنها مش جيدة برضه ..ومش اف**خ حاجة في الوجود زي ما فانزات الكاتب بيقولوا هي رواية عادية ممكن تكون لطيفة للبعض وسيئة للبعض التاني ..بس القدر خلاني من البعض التاني معلش بقا ..سلام .
ليست هناك تعليقات:
إرسال تعليق