تُفاحتي ..قوليلي ياتفاحتي ، هو انتي تفاحة عادية من الي هي الكيلو بعشرة ودول ولا مقطوفة من شجرة علي طريق مقطوع جنبه كشك صغير فيه جثة واحد متعلق ..أصل الجو لبش اليومين دول .
---------------------------------
عزبة التفاح الفاسد
الكاتب: كيرلس عاطف
اصدار: دار نون للنشر والتوزيع.
متوسط عدد الصفحات/234.
تاريخ النشر: معرض القاهرة الدولي للكتاب 2022.
---------------------------------
:عن العمل :
_قرية مفيش اي وسيلة تربطها بالمدن والقرى المجاورة غير طريق واحد ، من قوانين القرية انه ممنع المشي علي الطريق ده بعد غروب الشمس بسبب الكيان المخيف الي بيسكنه والي محدش يعرف ماهيته ، وعلي مدار الرواية بتقع شخصيات كتير ضحية لِ ألاعيب الكيان ده كل شخصية فيهم عندها تاريخ اسود وقصة مختلفة لكن الي بيربط بينهم هو شيء يخص عمدة القرية ، والأحداث دي كلها بتتحكي لينا علي لسان الي كان مراقب لكل الي حصل ..الي مش بشر بدوره هو كمان .
---------------------------------
مناقشة :
1_قبل الدخول في الرواية من الناحية الفنية حابب أشيد بجودة تقسيم فصول الرواية أو أجزائها علي هيئة "تفاحات " التفاحة الأولي والثانية وهكذا ..يمكن في ناس كتير لا تُلقي بال لهذا بس انا انسان تافه بركز مع الحاجات دي اوي وبتعجبني ، ولاحظت ان كيرلس من الناس الشاطرة في الموضوع ده لأنه عمل تقسيمة مشابهة في رواية سابقة ليه اسمها "صندوق الموتي " و دي الرواية الوحيدة الي قرأتها لكيرلس قبل العمل ده رغم انه كتب روايات تانية بعدها .
2_في تطور ملحوظ جدا في لغة كيرلس عن صندوق الموتي "الي كانت حلوة جدا بالمناسبة " يعني لو هنقول أنه لغته قبل كده جيدة فهي هنا كانت فوق الممتاز سواء في اساليبه وتشبيهاته أو طريقة تعليقه علي الأحداث .
3_نظام السرد الي غلب علي معظم أجواء الرواية كان مميز ، يعني انت هنا مش قدام سرد من النوع الروتيني أو شخص بيخاطبك كقارئ ، لا انت هنا عامل زي سليمان عيد في ظرف طارق ..حب من طرف تالت ، يعني واحد عارف الأحداث الي حصلت لواحد في الرواية فبيسردهاله وانت بتروح تقعد معاهم كده .
4_في تفصيلة اتحطت في أول العمل كانت نقطة قوة علي مدار الأحداث وحافز ليا اني اكمل قراءة للأخر وهي اننا عندي عنصرين خطر وقطبين في الرواية ..اول واحد فيهم هو كيان الطريق الي بيفتك بالناس ، تاني واحد وده الأهم هو الراوي للأحداث وعلي حسب كلامه عن نفسه في أول العمل فهو شيطان ذو قوة مهيبة قادرة تطيح بجيش من البشر وكانت من ضمن مهامه انه يكشف سر الطريق ده ومين المسؤول عن حوادث القتل البشعة دي ، ده خلاني متشوق اني اعرف ايه الي هيحصل ومنتظر مواجهة بينهم هما الاتنين .
5_المدخل الي كان بينتقل منه الكاتب من حدث لحدث ومن شخصية لشخصية اتعمل بشكل احترافي وعبقري جدا .
6_الرتم كان بطيء بعض الشيء في الأول ده لأن الأحداث بتدور في نطاق ضيق جدا ولكن مع الدخول في الرواية بدأت الأحداث في التسارع .
7_عجبني ان الكاتب كان معتدل في تلقينه المعلومات للقارئ ..يعني مبخلش عليه وخلاه مش فاهم وفي نفس الوقت مخلاش كل الحقايق تنبثق عليه مرة واحدة .
8_التفاحة الأخيرة والي بتمثل اخر جزء ونهاية الرواية والي تعتبر احد افضل الأجزاء ولكن في بعض التعقيبات ، الجزء الاخير لو جينا ناخده لوحده هنلاقيه حلو جدا ومتكامل من حيث كل الجوانب ، لكن المشكلة اني محسيتش انه متناسق اوي مع الجو العام للرواية الي بالرغم من انه كان نمطي بعض الشيء لكنه كان مستقر وممتع ومكنتش محتاج لمسة إبداعية تغير النمط الي انا كنت ماشي بيه ، يعني انا انبسطت لما عرفت هوية الشيطان الي بيحكي وان الكاتب ربط النهاية بروايته السابقة " لكن محسيتش ان دي القفلة الي انا كنت محتاجها ، كمان القدرات الي اكتشفت انها عند بنات العمدة دي متمهدش ليها خالص فمكنتش متقبل اوي التغير الي طرأ عليهم فجأة ده ..لكن للأمانة لو انا قرات الرواية الي فاتت كنت اكيد هستمتع بالجزء ده اكتر من كده .
---------------------------------
كمجمل الرواية حلوة جدا ومعمول فيها شغل ومجهود كبير اوي ..وطبعا برشحها
ليست هناك تعليقات:
إرسال تعليق