في يوم دخلت محل ملابس عشان اشتري ملابس "حمادة هلال ريأكت لاف" ..فالمهم تفوجئت "اه تفوجئت" بكمية الأصناف الموجودة وان كلها حلوة ..لدرجة اني كل ما إيدي تقع علي حاجة وتكون عجباني اقول لا اكيد فيه أحسن ولما اقع فعلا علي حاجة احسن الأولانية ترجع تحلو تاني في نظري ..المهم اشتريت كذا حاجة ووانا خارج مقدر جدا جمال الي معايا بس حاسس برضه إن في حاجات احسن ما زالت جوه كان ممكن أخدها..الغريب في الأمر اني لقيت باقي الناس الي بتشتري برضه بيقولوا نفس كلامي ..خارجين بحاجات جميلة اوي ومختلفة عن الي انا جايبها بس شايفين ان كان في احسن..فاحنا كلنا اختلفنا في فكرة ايه الاحسن عشان نشتريه..بس اتفقنا علي حاجة واحدة ..المحل عظمة .
__________________
الكاتب /أحمد عبدالمجيد.
اصدار /الرواق
تاريخ النشر /2018
متوسط عدد الصفحات /222
__________________
عن الرواية :
الرواية بتدور في زمن وعالم غير معلومين فيها شيء من الفنتازيا ولكن هي فلسفية أكثر من كونها خيالية ...بتحكي عن أربع أشخاص ..الجد والجدة والحفيدة والحفيد..والحفيد ده هو "انت " ولو سألتني هو انت ده يقصد بيها القارئ أو لا مش هقدر اجاوبك لأن الموضوع غريب سيكا وأكبر من اني احاول أوضحه فلما تقرأ هتفهم..المهم الأربعة دول قاعدين في كوخ والجد مانع اي حد انه يخرج بره الكوخ ده لأن في غيلان بره ..لكن الحفيدة بتكدبه وبتجر الحفيد ..أو بالأصح بتجرك انت عشان تخرجوا بره الكوخ وانك معدتش تحضر دروس الجد ..فياتري انت هتسمع كلامها ولا لا ..وياتري الجد خايف عليك فعلا ولا مش عايزك تشوف النور ؟
__________________
ايجابيات 📌:
1- الرواية زي ما قولنا فلسفية درجة اولي ووجبة أدبية دسمة ..مش ممكن كمية الإسقاطات والرمزيات الي فيها دي بجد ..فكرة انك تفكر الكوخ المغلق علي الي فيه بيرمز لإيه والجد ده بيرمز لإيه والحفيدة الي اسمها شادية بترمز لإيه طب والغابة والغيلان دي لا الموضوع عاوز تفكير كتير ..انا قرأتها اول مرة وحسيت ان في رمزيات تانية فايتاني فقراتها تاني واستنتجت حاجات جديدة ..ورجعت ناقشتها مع ناس تانيين كانوا شايفين الرمزيات دي من منظور تاني ..والمشكلة ان كلامهم برضه منطقي وممكن ..يعني بجد شابو للكاتب .
2- السرد والي كان اكتر حاجة مثيرة للجدل بالنسبالي ده لأن النوع ده من السرد الي هو انك تخاطب القارئ طول الرواية هو نادر جدا..وعلي المستوي الشخصي فدي اول مرة ليا أقرأ عمل من النوع ده ..فكرة ان الكاتب وهو بيسرد يقولك "انت عملت كذا " و استخدام صيغة الجماعة وهو بيخاطبك "كنا نعلم أنك كذا " "ثم أتيت إلينا" ..كانت حاجة مربكة ..لكن مع الدخول في أحداث الرواية بدأت احبها اوي واعرف قد ايه هي حاجة مميزة فعلا .
3- عدد الشخصيات كان قليل جدا وتصميمهم كان ممتاز بالنسبة لتأثيرهم في الرواية ..واكتر شخصية صُممت بشكل عبقري وغالبا ده رأي كل الي قرأوا الرواية هي "شخصية الجد " الي بتجمع بين صفات كتير ساعات نشوفها متناقضة وساعات نشوفه طيب وساعات نشوفه شرير ..شخصية الجد الي أحيانا بترمز للشخص المنقذ في حياتنا الي بيدعوا لحاجة معينة عشان خايف علينا لكن كلنا بنسخر منه ومن كلامه ودول في منهم كتير في الواقع .. وساعات نشوف الجد بيرمز للشخصية الي وظيفتها تضليلنا واخفاء حقائق كتير عننا واننا نعيش في ضالمة دائماً ..يعني والله هو حوار كبير ولو فضلت اتكلم عنه من هنا لبكرة مش هخلص .
4- بالرغم من ان شخصية الجد هي المفضلة عندي لكن شخصية البطل كان ليها طابع خاص ..ده اولا لأنها نوعا محيرة يعني انا كقارئ مش عارف هل هو لما يقولي "انت " يقصدني فعلا انه انا البطل ..ولا ده حد بيخاطب البطل جوه الرواية ..ثانيا لأن الشخصية متوصفتش الشخصية احنا عشنا معاها فترة بناءها من الصفر ..زي ما بتحكي الرواية فانت الي هو الحفيد نمت 35سنة وصحيت فاقد الذاكرة يعني ورقة بيضة الي بدأ بملء الورقة دي هو الجد بدروسه ليك ..ومن خلال استخدام ضمير المخاطب فالكاتب خلاك تحس فعلا انك البطل وتعيش معاه لحظة بلحظة بل إني احيانا كنت بتوقع قراراته واتخذها بدلاً عنه .
5- اللغة والي كانت عربية فصحي سليمة جدا والي ظهرت جماليتها اوي في وصف الكاتب للغابة أو وصفه للقرية وناسها في مذكرات الجد .
6- الإيقاع والرتم الي كان مقبول جدا في القسم الاول والثالث من الرواية .
7- العنوان الي مميز وله بعد فلسفي كبير .
8- الغلاف الي من تصميم كريم أدم والي عجبني اوي وبيوصف مشهد مهم موجود جوه الرواية .
__________________
سلبيات 📌:
طيب خلينا نقول انها مش سلبيات بالمعني الحرفي علي قد ما هي حاجات انا شايف انها كان ممكن تكون احسن :
1- القسم الثاني كان ممل نسبيا لو جينا نقارنه بالاول والثالث ورتمه كان بطيء ده بسبب المط والتطويل نظراً لأن انت كنت بتحكي مذاكرات الجد والي حصله قبل ما موضوع الكوخ ده ..لكن الي خلاني أكمله هو جمال اللغة والوصف الي اتكلمنا عنهم .
2- النهاية حسيتها كان ممكن تكون افضل ومفهمتهاش بشكل كامل ودي مشكلتي انا علي فكرة ..بس انا شايف انها لم تضاهي روعة باقي أجزاء الرواية .
__________________
كمجمل رواية التابع رواية حلوة جدا جدا جدا يعني ومن أجمل الأعمال الي انا قرأتها السنة دي وكانت بدايتي مع استاذ احمد عبدالمجيد وبرشحها طبعا لأي حد ...سلام 💛
ليست هناك تعليقات:
إرسال تعليق