مراجعة رواية "داو" لدعاء عبدالرحمن

حمادة كتب رواية اجتماعية مكانتش حلوة فقرر يخش في كتابة الفنتازيا .. حمادة لغته قوية وبيحب يناقش مواضيع حلوة في رواياته وفعلا كتب رواية احسن من بتاعته الاجتماعية .. لكن حمادة مشكلته انه مستعجل ومش بيدي كل حاجة حقها .. لا تكونوا مِثلَ حمادة.

___________________________

الكاتبة: أ /دعاء عبدالرحمن. 

اصدار /عصير الكتب.

تاريخ النشر /2019

متوسط عدد الصفحات /280

___________________________

عن الرواية:

احداث الرواية بتدور في مملكة داو في زمن ما بعد الحداثة بعد ما كل حاجة اتدمرت ..أهل الممكلة دي عندهم طقوس ومعتقدات غريبة وبيقدسوا الجن تقديس الآلهة عشان كده بيهابوا ساحر المملكة "سلطان " المقرب من الحاكم ..من ضمن الطقوس بتاعتهم هو يوم الحصاد الي بيختاروا فيه بنت عندها 19سنة تقدم كقربان للأسياد وبيتم اختيار أخت مراة الساحر ..لكنه بيهربها ومن هنا بتبدأ متاعبها..علي الجانب التاني هنلاقي في "جلال الدين" الي مداوم علي صلاته والوحيد الي سلطان بيخاف منه والي تم طرده من قريته المنعزلة عن داو لأسباب معينة ..فياتري ايه علاقة دول ببعض وايه الي هيربط ما بينهم في الرواية ؟ . 

___________________________

إيجابيات 📌:

1- لغة الكاتبة لا غبار عليها الحقيقة ..حلوة جدا جدا يعني وخدتلي كام اقتباس حلوين من الرواية كده انما ايه عنب . 

2- عجبني الغموض الي كان في الأسلوب "في الأول بس " 

3- الكاتبة كانت بتناقش من خلال الرواية كده قضايا مهمة زي جهل الناس بدينها والإيمان بأصحاب الكرامات وان اي شخص عادي ممكن يضحك عليهم بأساليب بسيطة ويفهمهم إنه ولي من أولياء الله وهو اصلا دجال ..وزي ميول الناس دايما للحلول السهلة لمشاكلهم زي الاستعانة بالسحرة والمشعوذين وقبولهم الدائم لتصديق الخرافة ..وزي العادات والتقاليد والأعراف العقيمة الي الناس بتستخدمها بدل الشرع والنصوص الدينية والي بسببها بيتظلم ناس كتير كان أبرزهم في الرواية "المرأة"  

4- عجبتني الرمزيات الي كانت في الرواية والي كانت ظاهرة اوي في أسماء الشخصيات.  

___________________________

سلبيات 📌: 

1- المفروض ان الرواية فنتازيا لكن الكاتبة فشلت في رسم عالم كامل مختلف عن الواقع يعني انا مكنتش قادر احدد ملامح لعالم داو ده إطلاقا لا منها مملكة في زمن مجهول مثلا ولا منها شكل تنبؤي لما بعد هدم الحضارات زي ما هو واضح في الرواية لأنها كانت بتقول أنه كان في أسلحة وتكنولوجيا وكهرباء لكن كل ده اتدمر بس انا محسيتش بكده . 

2- أسلوب السرد الي كان ممل ..كان غامض في الأول بس قولت أن ده مقدمة وكل حاجة هتكون واضحة ..لكنه فضل بنفس الطريقة ..كل ما اقول خلاص الأحداث هتبقي ملحمية اهي يتم تثبيطي تاني ..يعني ممكن الاحداث بدأت تكون متسارعة في اخر خمسين صفحة بس من عمر الرواية. 

3- البناء الضعيف للشخصيات باستثناء شخصية الساحر ..يعني في الرواية كل شخصية لها معاناتها الي بتعيشها والتحديات الي بتخوضها لكنها دخلت في ده علي طول من غير ما تمهد لحاجة . 

4- التطور السريع والي مش منطقي اطلاقا لطبيعة العلاقة بين ابطال الرواية ..يعني ازاي جلال الدين وسلطان بعد ما كانوا ألد اعداء لبعض يبقوا في نفس الفريق بالسرعة دي . 

5- الحبكة نفسها ضعيفة جدا ومش متزنة يعني مفيش حاجة أخدت حقها والأحداث عشوائية بشكل مُفرِط . 

6- حاجات كتير متجاوبش عنها كان أهمها ازاي الحاكم كان بيعرف حاجات غيبية. 

7- نهاية مفتوحة ومش مفهومة ..انا مش ضد النهايات المفتوحة لكنها ممكن تكون بعد ما كل حاجة أخدت حقها قبلها ..ومتقوليش ان في جزء تاني لأني طالما فتحت كتاب يبقي اقفله مش اعمل جزء تاني اجاوب فيه عن حاجات في الجزء الي سبقه ..الجزء التاني بيكون تكملة لأحداث الجزء الاول لكن له أحداثه الي تميزه هو.

___________________________

كمجمل الرواية فيها مشاكل كتير ..فيها نقاط قوة مننكرش ده ..في ناس ممكن تشوفها لطيفة وده حقهم يعني انا شخصيا قضيت معاها وقت مش سيء لكنها معجبتنيش كفنيات وده لأن فيها استسهال واستعجال واضح ..انا شايف انها كانت ممكن تكون احسن من كده لأن الفكرة نفسها حلوة وييجي منها بالإضافة للغة الكاتبة القوية لكن 280 صفحة كان عدد قليل عليها ..معنديش مشكلة لو كانت اكتر من كده بس كل حاجة كانت تاخد حقها... سلام 💛