مخطوطة سيرافيني - ما وراء الحاجات

 

في تراك بحبه اوي لويجز بيقول فيه جُملة عظيمة جدا وده الطبيعي بتاع وجوزة الحكيم يعني .. بيقول "سيبها في المُبهم موضحشِ .. لو مش فاهم مبشرحشِ"  .. الجملة دي لِما تحمله من معاني بين طياتها في اشخاص كتير بيعملوا بيها .. فمثلا بقا طبيعي ان كل فترة يطلع ممثل يعمل فيلم أو مسلسل محدش فاهم راسه من رجليه بس الي ظاهر في الهيكل العام انه عميق وهادف.. ايوه بيهدف ل ايه .. معرفش بس هو هادف وخلاص ..وطبعا الجمهور مش هيقول على نفسه غبي فهيقابل المسلسل بكمية "شابوهات "أولها عندي وأخرها عندك ..وهيثنوا علي الممثل الي بذل مجهود كبير في انه يقدم حاجة جديدة ومختلفة للشاشة .. وعلى صعيد آخر هتلاقي کاتب شاب اخرجلنا عمل روائي هو الوحيد الي فاهمه .. رواية لغتها مجعلصة بس هنقول عنها بليغة وشخصيات تصميمها زفت لكن هنقول انها غامضة ومقصود انها تكون مش واضحة .. حبكة ضعيفة غير متزنة لكن هنقول ان دي حيلة من الكاتب .. نهاية بنت ستين في سبعين محدش عرف منها الكاتب عاوز ايه لكن هنقول انها نهاية

مفتوحة تخلي القارئ يطلق العنان لمخيلته.. وفي الآخر كلنا هنشيد بقلم الكاتب وقدرته علي اخراج عمل فلسفي من الدرجة الأولي زي ده واي حد هيخالفنا في الرأي فهو جاهل مش قادر يتذوق المعاني الي تذوقناها وأخره يقرأ أرض زيكولا بتاعة الأطفال .

المهم الحاجة المشتركة بين الي فاتوا دول هي "متلازمة إثارة الجدل " والي بتتمثل في طرح أشياء غير مفهومة للعامة فيبدءوا يتساءلوا عن ماهيتها وأقرب مثال حي ممكن تستشهد بيه علي الكلام ده هو كتاب غريب ما زال عليه صخب ليومنا ده اسمه :"مخطوطة سيراڤيني" .. تعالي ندردش عنه شوية.

مخطوطة سيرافيني أو codex seraphinianus هو كتاب للمهندس والرسام الإيطالي لويجي سيرافيني" صدر لأول مرة

سنة 1981 بعد ما استغرق لويجي تلت سنين في كتابته.. الكتاب من فئة الكتب المصورة الي بتكون عبارة عن رسومات وأشكال تحتها شروحات وتفسير ليها ، وبمجرد نزول الكتاب كان في إقبال كبير عليه رغم سعره الي كان حوالي 2000 دولار والي يعتبر غالي جدا وقتها لكن بعد ما زاد الطلب عليه بشكل مبالغ فيه نزل سعره ل 125 دولار وده خلاه في المتناول اكتر.

طبعا انت خمنت من خلال كلامي في الأول ليه كان في إقبال كبير على الكتاب .. اكيد مش بدافع احتياج الناس ليه او احتواءه علي نُسُق معرفي معين لكن الإقبال عليه كان بدافع الفضول مش اكتر ..

الكتاب ياسيدي عبارة عن 360 صفحة مكتوبين بلغة غريبة عجز الجميع عن فهمها.. والمشكلة ان اللغة دي المفروض بتشرح رسومات الكتاب الي لا تقل غرابة عنها.. كل الي تقدر تفهمه أن ده عالم خيالي کامل صممه لويجي متكون من 11فصل.. كل فصل بيوضحلك جانب من اشكال الحياة في العالم ده ، فهتلاقي فصل عن آلات ومعدات انت مشفتهاش قبل كده ..فصل عن انواع من النبات تحسها مألوفة للمرة الأولى لكنها مالهاش نظير في عالمنا .. بعضها هتحسه جميل وبعضها هيثير اشمئزازك..ده غير وجود فصول عن كائنات شبيهة للبشر بتتزاوج بشكل بشع ومقزز، وكل ده مشروح باللغة الي شبه الطلاسم دي .

وبسبب ابداع لويجي في رسمه الي كان باين انه بيرمز لحاجة ومش عبثي اطلاقا بدأ عدد لا بأس من المترجمين والفنانين تكريس وقتهم في محاولة فهم ودراسة الكتاب واستنباط معاني اللغة دي لكنها باءت بالفشل.. ببساطة لأن دي مش لغة أصلا ..ما هو معلش يعني البشر الي قدروا يترجموا الإلياذا والاوديسا ويفكوا رموز حجر رشيد مش هيغلبوا في كتاب صدر في أواخر القرن العشرين لو كان وراه فعلا حاجة تستحق البحث أو لغز يستحق يتحل.. 

لكن الموضوع ابسط من كده خالص..الكتاب ملوش أي معني وده الي صرح بيه الكاتب نفسه، واللغة المكتوب بيها ما هي إلا طريقة كتابة عشوائية عملها الكاتب بطريقة تبان أنها مشفرة مش اكتر ومش بتحمل أي معني.

أما عن الدافع وراء إلي عمله لويجي فهو أنه حب يخرج بره الصندوق والشكل الروتيني للوحات ويطلع بحاجة يقدر بيها يجذب انتباه عشاق القراءة واللوحات مع بعض وده الي صرح بيه في كلامه عن كتابه لما قال : "إنك في الكتاب ترى ما تريد أن تراه، ربماتعتقد إنه يحدثك ولكن هذا مجرد خيال ..ما أردته الأبجدية التي استخدمتها هو إيصال ذلك الإحساس الذي يشعر به الأطفال وبيديهم کتاب لا يفهمونه للقارئ، لقد استخدمته لوصف عالم خيالي، والرسومات أيضا نشأت من الصدام بين عالمنا الحقيقي وعالمي الوهمي"

وبالرغم من تصريحات لويجي دي للأسف في الي لسه مؤمن بنظرية المؤامرة وان الكتاب ده فيه نظریات متعلقة بتغيير العالم واللعب في ايدولوجيات اجسام البشر ودول ربنا يعينهم على المهلبية الي في دماغهم الحقيقة لأن حتي لو اعتقادك ده صح فانت طالما مش قادر تخرج بشيء من الكتاب فأنت مش بتعمل حاجة غير انك بتضيع وقتك .. بعدين انقاذ البشرية مش متوقف علي اهلك يعني. 

في فئة كبيرة من النُقاد شايفين الي عمله لويجي سيرافيني ده ملوش قيمة وان هو والي زيه كتبهم بتحجب أعمال أخري مفيدة وتحد من ظهورها وبيستغلوا ميول الجمهور لكل ما هو مثير وخفي علشان يتشهروا..لكن انا شخصيا مش متفق معاهم أوي ده لأن أولا لويجي تعب فعلا في الكتاب خاصة في الرسومات الخلافة والإبداعية إلي عملها والأشكال التخيلية الي رسمها لماكينات ممكن تتوجد فعلا في المستقبل ومش معقول هنقارن كتابه بأعمال اتشهرت بنفس الطرق لكن بأسلوب رخيص زي كتاب "ما يعرفه الرجال عن النساء" الي عبارة عن 120صفحة فاضيين.. ثانياً بالرغم من ان كتاب لويجي ممكن ميكونش له أي معني لكنه اثبت انك ممكن تتبع اسلوب معين في طرح الحاجة الي بتقدمها وتخرج من دوامة التلقين والكلام المباشر.. يعني نفترض ان حد كان عمل كتاب زي ده لكنه فعلا جواه مادة علمية ..كده يبقي ضرب عصفورين بالحجر ..من الآخر خليك مثير للجدل بس احرص انك تكون مُفيد.