قصص "الكريبي باستا" ..ودي مجموعة من قصص الرعب بتنزل علي اكتر من موقع اجنبي ، الي بيميز القصص دي وخلاها تنتشر هو انها مجهولة المصدر وبتنزل علي مواقع مختلفة بدون كتابة اسم الراوي أو المؤلف وده بسبب ادعاء المواقع الي بتنشرها ان الكريبي باستا هي قصص حقيقية حصلت فعلا وانهم مجرد بينقلوها ليك علي لسان أصحابها مش اكتر .
من ضمن القصص دي كان في قصة بتحمل اسم "smiler dog" أو بالعربي الكلب المبتسم كان ملخصها ان في طالب اسمه مايكل كان بيقدر يدخل للدارك ويب وفي مرة من المرات الي كان موجود عليه صادفته صور علي أحد المواقع لكلب من نوع هوسكي وبيبتسم ابتسامة بشرية مخيفة ومكتوب تحت الصور انك طالما شفت الصور دي لازم تنقل خبرها لحد تاني وتخليه يشوفها وإلا الكلب المبتسم في الصورة هيظهرلك في كل حتة لحد ما يصيبك خلل عقلي يخليك تنتحر ، مايكل مصدقش الكلام ده ومن باب المتعة حمل الصور علي جهازه ولما راح مدرسته قال لصحابه علي الصور الي قابلته دي علي سبيل الضحك وخدوها كلهم علي نفس المتناول ، بعد ما خلصوا كلام راح لمايكل واحد زميله معروف عنه انه مصاب بالصرع وقاله ان عنده فضول يشوف الصور دي فمايكل ارسلها له وبعد فترة من اختفاء زميله جالهم خبر انه دخل المصحة النفسية وطالب يشوف مايكل ولما مايكل راحله ودخل عليه الأوضة لقاه خانق نفسه وميت مع اثر لعضات كلب ورسالة منه كاتب فيها انه من ساعة ما شاف الصور وهو بيشوف الكلب المبتسم في كل حتة .
القصة دي عملت جدل كبير بين قُراء الكريبي باستا خاصة بسبب الصور المخيفة لكلب مبتسم الي كانت ملحقة بالقصة علي انها فعلا الصور الحقيقية للكلب الي شافه بطل القصة ، وبعضهم قال انه حس بشعور غريب وتوتر لما شاف الصور دي .
طيب بغض النظر عن ان القصة دي بنسبة 99,9% مزيفة ومش حقيقية والنسبة دي برضه تنطبق علي كل قصص الكريبي باستا لكن خلينا نمسك في الاحتمالية الي نسبتها واحد من عشرة في المية دي وندردش عنها شوية .
اي حاجة جاية من الدارك ويب او الانترنت المظلم هي حاجة غير آمنة وكلنا عارفين ده ..طب هل ده معناه ان الصور دي فعلا فيها حاجة غير طبيعية وان تأثيرها ده حقيقي !
الإجابة هي لا طبعا ..الصور دي ما هي إلا طريقة من طرق التخويف الشائعة علي الانترنت والي بتعتمد علي الوهم والإيحاء ..الوهم الي يعتبر من أكبر أعداء الإنسان اصلا ..معلش يعني انا لو دخلتك بيت وقولتلك البيت ده مسكون وفيه أشباح وهو مش كده طبيعي هتخاف وتبدأ توهم نفسك بحدوث حاجات غير طبيعية في البيت ، ولو أكلتك حاجة وقولتلك ان فيها سم وهي مفيهاش حاجة برضه طبيعي ان بطنك هتوجعك وتجيب الي في بطنك ..كل ده بسبب الوهم ، وبنفس الكيفية لما اجبلك صور لكلب بيبتسم ابتسامة مرعبة واقولك عنه شوية كلام طبيعي انك تخاف وتبدأ توهم نفسك ان في خلل هيحصل في مخك وحسب القصة الواردة فالولد الي انتحر اصلا كان مريض نفسي وعنده صرع فما بالك لو وريته صور زي دي فالي حصله ده شيء وارد الحدوث جدا .
أما عن غرض وجود الصور دي فبعيداً عن غرض الرعب فالناس الي صمموا صور الكلب ده ليهم أغراض باطنية تانية لأن وجودها علي الانترنت المظلم عمره ما هيكون لغرض واحد.
فكرة اختيار فصيلة الهوكسي بالذات انها تكون نوع الكلب في الصور ده أداة تجارية خفية يإما لضرب شعبيته وتقليل الطلب عليه بسبب خوف الناس من الصور او الغرض هو الترويج له وجعل الناس تمتلكه بدافع الفضول .
من ضمن الأغراض المحتملة برضه ان دي محاولة لإحياء اساطير عن الكلاب قديماً ، وده باين في الشبه الكبير الي بين صورة الكلب وبين لويسون وده اسم لكلب موجود في الأساطير الإغريقية بيسكن المقابر وبيتغذي علي اللحم الفاسد ،ده غير وجود جنس الكلاب اصلا في معظم الميثولوجيات القديمة الي كان رمز للخوف والخطر في بعضها ورمز للوفاء والنبل في البعض التاني .
فباختصار معظم الأشياء الي بتقابلك أو بتبان غامضة أو مرعبة هي متمش وضعها بشكل عبثي او عشوائي وانما في أصل ليها وفي غرض من انها تظهرلك.
طبعا الكلام الي فات ده لو القصة كانت حقيقية فعلا لكن زي ما قولتلك في احتمال كبير انها متألفة لإخافة مستخدمي مواقع كريبي باستا مش اكتر ..انا شخصيا شفت صور الكلب دي ومحصلش حاجة ولغاية منا بكتب البوست ده حاليا كل شيء عاد..لحظة ايه ده
ليست هناك تعليقات:
إرسال تعليق