اختلال:
الكاتب /د/سمر سيد.
اصدار /الفنار للنشر والتوزيع
متوسط عدد الصفحات/153
تاريخ النشر /2021
تصميم الغلاف /عبدالرحمن محمد "عبقرينو"
_____________________
عن الكتاب:
اختلال هو العمل الورقي الاول لدكتور سمر سيد الي بتناقش فيه في خمس فصول اشهر الأمراض والاضطرابات النفسية الي بيعاني منها العامة ومسبباتها وطرق علاجها ..فهنلاقيها بتتكلم عن الفرق بين المرض العقلي والنفسي وعن الإدمان واضراره وعن انواع الفصام والمتلازمات الي بتصيب البني ادم والكلام الي بالك فيه ده يعني .
_____________________
ايجابيات 📌:
1- الأسلوب البسيط للكاتبة الي هيخلي الكتاب يخلص معاك في قعدتين بالكتير لأنه مش مكلكع أو معقد علي عكس كتب تانية تحت نفس التصنيف .
2- تناول الكتاب لأكتر من موضوع مختلف مع بعض بأسلوب سلس فمش بيحصرك علي موضوع معين لا هو بينوع وبيكلم عن كل حاجة بشيء من التفصيل فبالتالي رغم قلة عدد صفحاته هيخليك ملم بأكتر من حاجة بالقدر المقبول .
3- فصل الإدمان الي كان مُصاغ بشكل احترافي ده لأنها عرضت فيه كل انواع المخدرات والأعراض المصاحبة لكل نوع لدرجة اني شكيت انها بتاجر فيهم .
4- الفصل التالت والخامس والي يعتبورا المفضلين بالنسبالي ..ده لأن الكاتبة استشهدت بقصص واقعية حدثت بالفعل وبعد كل قصة توضح الظاهرة الي بيعاني منها بطل القصة دي ومسبباتها ..وده اعطي جو اثارة اكتر للكتاب وزود الشغف عند القارئ أنه يعرف المعلومة بل وكمان بيثبتها عنده .
_____________________
سلبيات 📌:
1- بعض الأجزاء كانت مملة نوعا ما ..ده بسبب تحول الأسلوب من مناقشة أو عرض لقضية معينة لأسلوب تلقيني كأني بعطيلك محاضرة وبدخلك المعلومة في راسك بالعافية وده ازعجني شوية .
2- احيانا كنت بحس ان الكلام بيتكرر يعني انا قريت ده لسه في الاول بالإضافة لأن بعض المصطلحات لما عرضت الاختلاف بينها حسيتهم نفس الحاجة برضه ملقيتش فرق بينهم ..ممكن نلتمس العذر لأن الحاجات الي زي دي كلها داخلة في بعضها وفي تشابه كبير بينها لكن مفيش شك أنه كان ممكن نعرضها بشكل احسن وأكثر تباين.
_____________________
في الختام حابب اقول ان اختلال كتاب جيد جدا ولو حابب تقرأ في النوع ده فهو يعتبر مدخل كويس جدا ليك ..سلام
ليست هناك تعليقات:
إرسال تعليق